هلال وظلال
عبد المنعم هلال
• من يوم ما جاء فارس عبد الله إلى الهلال من أهلي شندي سنة 2018 وهو مثبت نفسو كلاعب ما عادي.. لاعب جاد ومنضبط وماشي بخطى ثابتة لحدي ما بقى ركيزة في الهلال وفي المنتخب الوطني.
• فارس بيلعب بروح ما بعرف غياب ولا تمرد، وبأدي الواجب المطلوب منو تمام. مرات بتلقى الجماهير بتنتقدو وبتقول فيهو عيوب.. لكن العيوب دي موجودة في أي لاعب كرة وما بتنقص من قيمتوولا من مكانتو كلاعب أساسي.
• نعم، فارس عندو عيوب ونواقص، لكن دا ما مبرر للهجوم عليه عقب كل مباراة.
• فارس لا يحظى بحب الجماهير، فمهما فعل يقولون فارس (كعب)!
• الجميع ركّزوا على الجوانب السلبية في فارس، والأمر دا أدّى لانطباع كأنو اللاعب ما عندو إيجابيات.
• الفترة الفاتت مرّ فارس بلحظات صعبة.. في ناس طالبوا بإبعاده عن التشكيلة، وأصوات نادت بشطبو، وما لقى السند والتشجيع. لكن فارس عندو عزيمة وإصرار بيرجع بيها كل مرة أقوى من الأول. المدربين البمرو على الهلال والمنتخب دايمًا بيحسبو ليهوحساب، لأنه زول منضبط وبيعرف يدي الكورة بإخلاص، وما بعترض ولا بيتذمر، وما بعرف التمرد ولا المطالب. بيلعب كورتو(من سكات)، والهلال دايمًا بلقاهو وقت الحاجة.
• في الديربيات والمباريات الكبيرة، فارس غالبًا بكون مفتاح لعب مهم.. مرّة بتلقاهو في الهجوم بيعمل اختراقات وتمريرات خطيرة، ومرّة واقف زي الجبل في الدفاع. وحتى لمن يحاولويستفزوه أو يطلّعوهو من طوره، بيرد عليهم بأداء قوي بيأكد إنو فعلًا (فارس).
• ومع كشف الهلال المليان أجانب، وجود فارس بقى مهم جدًا.. لأنه واحد من اللاعبين الوطنيين البعرفو الهلال من جوة وبرة، وبيلعببحرارة قلب وبروح الشعار. يمكن ما عاد فارس زي بداياتو، لكن لسه بمثّل الخبرة والثبات والرجولة البحتاجها الهلال في مشاويرو الكبيرة.
• مرّ على الهلال عدد كبير من المحترفين الأجانب في الطرف الشمال، وفارس صامد وسايد الفرقة.
• كفاية هجوم على فارس، فقد أعطى الهلال كل ما عنده ولم يستبق شيئًا.
ظل أخير
فارس ما بس لاعب طرف.. فارس روح قتالية واسم مربوط بالانضباط والجدية وحب الشعار.
كلنا حدباي.
0 التعليقات:
أضف تعليقك