‏هلال وظلال
‏عبد المنعم هلال
‏

‏
‏ـ الناس لما تتكلم عن المنتخب السوداني ما بتتكلم بس عن كورة ولا تسديدات بتتكلم عن أمل صغير في زمن كبير الوجع عن صورة وطن ممكن ترجع البسمة لشعب اتوجع عن لحظة بتخلينا ننسى الهموم ونعيش كلنا على قلب واحد.
‏ـ المنتخب بالنسبة لينا ما فريق ساي.. هو قصة وطن في زمن الحرب والشتات هو الرمز الباقي اللي بيلم الناس من أقاصي السودان.
‏- المباريات الجاية.. طريقها صعب لكن ممكن نصل وحسب الجدول المنتخب عنده مباريات مهمة في تصفيات كأس العالم 2026 – قارة أفريقيا
‏يوم 10 أكتوبر ضد موريتانيا
‏ويوم 14 أكتوبر ضد الكونغو الديمقراطية
‏مباراتين صعبتين لكن ما مستحيلات.
‏ـ المدرب الغاني كواسي أبياه شغال بهدوء بيجهز اللاعبين نفسياً وفنياً وبيحاول يصنع توليفة من المحليين والمحترفين بالخارج فيها توازن وانسجام. وشغال بخطة واضحة بيعتمد على الانضباط الدفاعي والمرتدات السريعة وبيحاول يرجع للمنتخب هيبته القديمة،
‏هيبة (صقور الجديان) البتعرف الخصم إنو قدام فريق عندو روح ما بتموت.
‏- المنتخب بيجمع بين لاعبين شباب من الدوري المحلي والمحترفين السودانيين في الدوريات الخارجية ودي ميزة كبيرة لأنها بتخلينا ندمج الحماس مع الخبرة.
‏ـ لكن برضو عندنا تحديات.. اللياقة والإصابات والتنقلات وعدم اللعب داخل الوطن كلها ظروف بتخلي التحدي أكبر لكن برضو بتخلي الانتصار أجمل لو تحقق.
‏- من خلال مباريات المنتخب الأخيرة واضح إنو أبياه ماشي بخطة 4-3-3 أو 4-2-3-1 بيعتمد على وسط صلب ومرتدات منظمة وبيحاول يستغل الكرات الثابتة.
‏ـ لو عرفنا نبدأ بقوة قدام موريتانيا ونحافظ على التركيز قدام الكونغو ممكن نرجع بثلاث أو أربع نقاط تغير شكل المجموعة كلها.
‏- اللعب خارج الديار.. معاناة وعزيمة وكلنا عارفين إنو الحرب خلت المنتخب يلعب كل مبارياته بره السودان
‏وده ليهو تأثير كبير على الراحة والروح لكن الجميل إنو دا خلق جمهور سوداني جديد في المهجر بيلف ورا المنتخب من بلد لبلد بيرفع العلم وبيهتف باسم السودان.
‏ـ المنتخب بقى صوت الوطن الموجوع ورمز للوحدة والصمود ووجه جميل في زمن صعب.
‏- المدرب الغاني كواسي أبياه بيشتغل بعقلية (التدرج)
‏ما داير معجزات لكنه داير يبني فريق ثابت الشخصية
‏وفي نفس الوقت يدي الشباب فرصة.
‏ـ المتابعين شايفين تحسن في التنظيم والانضباط لكن محتاجين تطوير هجومي أكتر ولازم نشتغل على صناعة الفرص وتحويلها لأهداف.
‏-أمل الناس كبير في المنتخب وفي زمن الحرب والشتات المنتخب هو الحاجة الوحيدة البتجمعنا بدون خلاف هو العلم الباقي واقف واللحن البينشدوا الكل هو الملامح الجميلة لوطن تعب لكنه لسه واقف.
‏ـ لما المنتخب يدخل الملعب الناس في الداخل والخارج بيدعوا (يارب يرفع راسنا ونفرح شوية).
‏ـ الفرح دا ما محتاج بطولة كفاية إنو نشوف فريقنا بيقاتل بشرف.
‏-اشتغلوا على الجانب النفسي قبل الفني وحافظوا على روح الجماعة داخل المنتخب ودايرين تواصل دائم مع الجمهور، لأنو الدعم المعنوي بيسوي فرق.
‏ـ خلو النقد البناء هو القاعدة مش السخرية.
‏- المنتخب هو عنوان الأمل والمنتخب اليوم في مفترق طريق.. عندو مدرب واعي ولاعبين عندهم رغبة لكن الظروف صعبة والضغط كبير.
‏ـ ومع دا كله يبقى المنتخب هو صوت السودان الواحد،
‏اللي رغم الألم لسه بيحلم ولسه بيلعب ولسه بيقول (نحن صقور الجديان لو تعبت الأرض بنطير فوق الغمام).
‏
‏